Jan
16
2016

U Rwanda rwatangiye irushanwa rya CHAN rutsinda Cote d'Ivoire

Mu mukino wa mbere wo gufungura irushanwa rikinwa n’abakinnyi bakina imbere mu bihugu byabo CHAN, ikipe y’igihugu y’u Rwanda yatangiye itsinda inzovu za Cote d'Ivoire igitego 1-0.

Nyuma y’ibirori byo gufungura imikino ya CHAN ku nshuro ya Kane, ikipe y’igihugu cy’u Rwanda Amavubi na Les Elephants za Cote d'Ivoire nibo babimburiye abandi mu mukino watangiye ku isaha ya saa cyenda zuzuye z’i Kigali.
Ni umukino witabiriwe na Nyakubahwa Perezida wa Repubulika Paul Kagame, umufasha we Madamu Jeannette Kagame, imfura yabo Ange Kagame, abagize Guverinoma batandukanye n’abafana benshi bari buzuye Sitade Amahoro.

Abakinnyi babanjemo ku ruhande rw’u Rwanda ni Ndayishimiye Eric, Fitina Ombalenga, Abdul Rwatubyaye, Emery Bayisenge, Celestin Ndayishimiye, Amran Nshimiyimana, Innocent Habyarimana, Yannick Mukunzi, Jean Claude Iranzi, Jaques Tuyisenge na Danny Usengimana.

Ababanjemo ku ruhande rwa Cote d’Ivoire ni Badra, Marcelin, Mahan, Essis, Soualio, Atcho, Gbagnon, Koffi, Yace, Djedje, Cheick.
Ku munota wa 16 w’umukino umusore Emery Bayisenge yatsinze igitego cya mbere cy’u Rwanda ari nacyo cya mbere muri iri rushanwa ku mupira w’umuterekano (Free-Kick) yateye ujya mu izamu ntawe ukozeho.

Umukino wagaragayemo gukina neza ku ruhande rw’u Rwanda ndetse rubona amahirwe menshi yo gutsinda ibindi bitego harimo na penaliti rwabonye ku munota wa 60 Emery Bayisenge ayitera mu maboko y’umuzamu wa Cote d'Ivoire.

Imikino ya CHAN yatangiye i Kigali kuri uyu wa Gatandatu tariki 16 Mutarama, izarangira kuwa 7 Gashyantare 2016. Izitabirwa n’amakipe 16 agabanyije mu matsinda ane, ikazakinirwa mu mujyi wa Kigali, Huye, na Rubavu.

Langues: 
Genre journalistique: 
Thématiques: 

Partager