jui
22
2015

Abarundi baba mu Rwanda bitabiriye amatore ku rugero ruciriritse

Abarundi batuye mu Rwanda bitabiriye igikorwa cy’amatora y’umukuru w’igihugu kuri uyu wa Kabiri tariki ya 21 Nyakanga 2015 kuva mu masaha ya kare mu gitondo, n’ubwo ubwitabire bwabo butigeze bugera ku cya kabiri cy’abari bateganyijwe.

Abarundi batuye mu Rwanda ariko batari impunzi bahuriye kuri Amabasade y’u Burundi i Kigali, ahari hafunguwe ibiro by’itora kuva saa kumi n’ebyiri za mu gitondo.

Indorerezi ntizari nyinshi, ariko habonetse Niyongabo Pierre Claver, umurundi utuye i Burayi wari indorerezi kuri Ambasade y’u Burundi mu Rwanda, akaba yavuze ko amatora yabaye ntangere n’ubwo hatoye mbarwa.

Ambasaderi Ntukamazina uhagarariye u Burundi mu Rwanda yasobanuye ko impamvu impunzi zitemerewe gutora ari uko hari uburenganzira zitemererwa mu masezerano mpuzamahanga, harimo n’ubwo gutora.

Abarundi batoreye i Kigali ni 57 mu basaga amagana abiri bari bitezwe ko baza gutora. Abatoye, buri wese yahabwaga urupapuro ruriho amazina y’abakandida, akajya mu bwiherero agatora mu ibanga, agashyirwaho ikimenyetso cy’uko yatoye ubundi akitahira.

Biravugwa ko muri 57 batoreye muri Ambasade y’u Burundi i Kigali, 30 batoye Petero Nkurunziza.

Langues: 
Genre journalistique: 
Thématiques: 

Partager