fév
14
2017

U Rwanda rugiye gukoresha asaga 100 000$ rusukura ‘transfo’ zagaragayemo amavuta ahumanya

Ikigo cy’Igihugu gishinzwe kubungabunga Ibidukikije (REMA) n’Ikigo gishinzwe gutunganya amashanyarazi mu Rwanda (EUCL), batangiye kwimura transfo zasanzwe zifite ikibazo cy’amavuta azwi nka PCB (Polychlorinated biphenyl) afite ingaruka zikomeye ku buzima bw’abantu no ku bidukikije.

Igikorwa cyo kwimura izi ‘transfo’ cyatangiye kuri uyu wa Kabiri, tariki ya 14 Gashyantare, zivanwa i Gikondo ahahoze hakorera inganda zijyanwa mu Murenge wa Jabana aho zigomba gutunganyirizwa bitarenze uyu mwaka.

Ku ikubitiro himuwe transfo 25 zari ziherereye i Gikondo mu gihe izindi ebyiri ziri kuri Banki Nkuru y’Igihugu, BNR nazo zizajyanwa ahabugenewe mu minsi iri imbere.

PCB ni imiti y’ubutabire ikoreshwa by’umwihariko muri transfo, zigabanya cyangwa zikongera ingano y’amashanyarazi. PCB zigira uruhare rukomeye mu guhangana n’ubushyuhe bwinshi n’inkongi by’umwihariko ku bikoresho bikorana n’umuriro w’amashanyarazi, zishobora no gukoreshwa mu bikoresho bya palasitiki.

Mu ibarura ryakozwe mu mwaka ushize, byagaragaye ko hari transfo zisaga 3000 mu gihugu hose ariko 196 zasanzwe zirimo PCB, ziganjemo inyinshi zaguzwe mu myaka ya 1986.

Umushinga wo gutunganya izi transfo no gukuramo aya mavuta ushobora kuzarangira utwaye asaga ibihumbi 100 by’amadorali ya Amerika, akabakaba miliyoni 82 mu mafaranga y’u Rwanda nyuma y’ibiganiro hagati y’impande zirebwa n’ikibazo. Biteganyijwe ko bitarenze kuya 31 Ukuboza 2017, izi transfo zizaba zamazwe gutunganywa.

Isoko ryo gutwika PCB ryahawe uruganda rwa CIMERWA

Mu gihe biteganyijwe ko aya mavuta azatwikirwa mu ruganda rwa CIMERWA, Umuhuzabikorwa mu micungire y’ibihumanya kandi biramba muri REMA, Ndizeye Rusakana Eliezer, atangaza ko batangiye gushaka inzobere izabafasha gupima niba ibyuka bizaturukamo nta ngaruka bishobora kugira ku buzima bw’abantu.

Yagize ati “ Izi transfo zigiye kuvanwa hano nk’uko itegeko rigenga ibidukikije ribiteganya. Twakoze ibarura rya transfo ziri mu gihugu, tureba niba zifite PCB. Twakoresheje za laboratwari dupima amavuta tumenya za transfo zirimo PCB. Igikorwa turimo ni ukuvanaho za transfo zirimo PCB zikajyanwa ahabugenewe kugira ngo amavuta avanwemo.”

Yakomeje atangaza ko aya mavuta namara kuvanwamo azajyanwa muri CIMERWA agatwikwa.

Rusakana yatangaje ko PCBs igira ingaruka zitandukanye ku buzima bwa muntu.
Ati “ PCB zitera indwara ya kanseri, iz’ubuhumekero, iz’uruhu ndetse n’ubumuga butandukanye. Iyo transfo zishaje zatangiye kuzaho umugesi ku buryo amavuta atangira kugwa hasi, imvura iyo iguye ikayatwara, ubutaka burahumana, imyaka ibwezeho ishobora guteza uburwayi butandukanye birimo na kanseri ku muntu uyiriye.”

PCB zifite ubumara bushobora kumara imyaka 30 zikiri mu butaka, ibintu bishobora kugira ingaruka ku kurumbuka kwabwo.

Ibikoresho birimo PCB byiganjemo ibyakozwe kuva mu 1929, ubwo aya mavuta yakoreshejwe cyane n’inganda zikora ‘transfo’ n’ibindi bikoresho bikenera cyane amashanyarazi.

Kuva mu 1929, miliyoni ebyiri za PCBs zimaze gukoreshwa muri zo zigera ku 10% ziracyagaragara mu bidukikije uyu munsi.

Hari ibihugu byatangiye guhagarika ibikoresho bifite cyangwa bikoreshwamo PCB mu myaka ya 1970 ishyira 1980 kubera ingaruka byari bifite ku buzima bw’abantu ndetse n’ibidukikije.

Izi transfo zagaragayeho ikibazo zishobora kongera gukora ariko hari izigera kuri 20 zizatwikwa kubera ko zifite igipimo kiri hejuru y’umubare fatizo wa ppm (parts per million) 50.

IGIHE

Langues: 
Genre journalistique: 
Thématiques: 

Partager