jui
15
2016

Perezida Robert Mugabe yabimburiye abandi bakuru b’ibihugu bitabiriye inama ya AU

mugabe.jpg

Perezida Mugabe yakirwa ku kibuga mpuzamahanga cy'indege cya Kigali

Perezida wa Zimbabwe Robert Mugabe yasesekaye i Kigali aho aje kwitabira inama ya 27 y’Umuryango wa Afurika Yunze Ubumwe iri kubera mu Rwanda. Niwe Mukuru w’Igihugu wa mbere mu bazitabira iyo nama ugeze mu Rwanda, mu bagera kuri 35 barimo Bashir wa Sudani bemeje ko bazayitabira.

Mugabe waje mu Rwanda yatorewe kuyobora AU mu mwaka wa 2015 muri manda y’umwaka umwe, akaba yarasimbuwe kuri uwo mwanya na Perezida wa Tchad, Idris Deby Itno.

Ibiganiro ku rwego rw’abakuru b’ibihugu na za guverinoma bizatangira kuwa 16 Nyakanga, byiswe African Peer Review Mechanism (APRM), uburyo bwashyizweho n’abakuru b’ibihugu bya Afurika mu kwikorera isuzuma mu nzego za politiki, ubukungu n’imibereho myiza.

Kuri uwo munsi kandi abakuru b’ibihugu bazitabira inama ku mahoro n’umutekano muri Afurika, ikazitabirwa na ba Minisitiri b’Ububanyi n’Amahanga, ba ambasaderi n’abayobozi ba Komisiyo y’Umuryango wa Afurika Yunze Ubumwe.

Kuva kuwa 17 kugeza kuwa 18 Nyakanga, nibwo hategerejwe inama yaguye ya AU, izitabirwa n’abakuru b’ibihugu na za guverinoma, abahoze ari abaperezida, ba ambasaderi muri AU, ba Minisitiri b’ububanyi n’amahanga, abayobozi ba Komisiyo y’Umuryango wa Afurika Yunze Ubumwe n’imiryango igamije ubukungu mu turere tunyuranye twa Afurika.

Ibikorwa bitangira iyi nama ku Cyumweru tariki ya 10 Nyakanga, byabimburiwe n’inama y’Abambasaderi bahagarariye ibihugu byabo muri AU, imiryango iyishamikiyeho n’abayobobozi ba Komisiyo ya AU, batangiye inama ya 32 isanzwe y’abagize akanama gahoraho ka AU, Permanent Representatives Committee (PRC).